Berdintasunezko elkarbizitza

Azalpena:
Proposamen honen helburua genero-parekidetasuna jorratzea da, norberaren izaera sano osatzetik abiatuta, estereotipoak hautsita eta aniztasuna onartuta. Hainbat jarduera eta metodologiaz baliatuz, bai gertuko ingurunean, bai testuinguru globalagoetan, generoa dela bide, jazotzen diren desberdinketak atzeman eta aintzat jotzea nahi dugu; era berean, berdintasunetik abiatuta, bizimodua egin eta partekatzeko desberdintasuna eta aberastasunaren garrantzia azpimarratzeko balio duten jarrera eta jarduerak sustatzea. Etapa honetan, maila pertsonalean eta sozialean, genero-desberdintasunak aintzat hartu eta analizatzeko lanari helduko dio proposamenak. Bideoak ikusi, rol-jokoetan eta jarrera hartzeko dinamiketan parte hartuz, besteak beste, hainbat gai jorratuko dira, hala nola bikotearen harremanak, genero-estereotipoak, etab. Beste aldetik, publizitatezko irudi eta mezuak kritikoki irakurtzeari garrantzi berezia emango zaio, izan ere, horren bidez gizartean gertatzen diren diskurtso estereotipatuei mozorroa kentzen baitzaie. Atzenik, generoarekin zerikusia duten desberdintasunei amaiera ematen laguntzeko ere, nork bere konpromisoa hartzeari arreta emango zaio.