O Debate. Quendas de exposicions e replicas nunha frenetica carreira contra o reloxo

Organización e realización dun concurso de debates en todo o Centro para fomentar a expresión oral do alumnado. Esta iniciativa naceu ao constatar a necesidade de facer actividades que motiven os alumnos e alumnas a se expresaren oralmente perante o resto dos seus compañeiros e compañeiras, xa que a maioría das actividades que se impulsan na aula son de expresión escrita.

En primeiro lugar execútase unha fase de aula, en que os equipos de cada aula debaten entre eles e o equipo que mellor argumenta e defende a súa postura, pasa á segunda fase; a de centro. Nesta fase enfróntanse (no salón de actos) os equipos vencedores de cada nivel (tres niveis: primeiro ciclo da ESO, segundo ciclo da ESO, 1.º de Bacharelato), creando grande expectación e emoción entre os seus compañeiros.

Ademais do fomento da expresión oral, esta experiencia permitiu desenvolver a capacidade de diálogo, escoita e argumentación, ao ter que reflexionar sobre un tema determinado debendo buscar argumentos a favor e en contra, a pesar das opinións propias de cada individuo e grupo.