Bolboretas de cores

Este caderno presenta a Roberto, un neno de Angola, que introduce o alumnado na realidade do seu país e nas consecuencias da guerra que se viviu e que aínda perduran. Esta proposta ten como obxectivo que o alumnado coñeza as consecuencias que produce o comercio de armas, concretamente o das minas antipersoa, e as repercusións sufridas por millóns de persoas en todo o mundo. A través da análise de debuxos de nenos e nenas implicados no conflito dos Balcáns, serán traballados os sentimentos e sensacións que a guerra nos esperta.

Este material pretende, igualmente, valorizar a paz e a xustiza social como dereitos fundamentais de todos os seres humanos e establecer mecanismos que fomenten a resolución e transformación de conflitos, tanto a escala internacional como persoal. Este punto é exemplificado coa historia de dúas cabras que mostran a necesidade de desenvolver solucións creativas aos conflitos. Como síntese, proponse a elaboración dun libro xigante con todas as aprendizaxes, opinións, etc. de forma que poida contribuír para dar a coñecer este traballo ao resto da escola e ás familias.