Diferentes mais iguais

Esta actividade xorde a partir do traballo feito con dúas aulas de nenos e nenas de 4 anos dentro da proposta Conectando mundos 2014-2015, co título “Cando os dereitos se frustran”, que aborda os dereitos sociais básicos.

Neste cadro, descubrimos tamén o dereito de toda persoa a ter unha identidade propia e plural, que non implica excluír o diferente, senón aprender a sumar. É a lóxica da diferenza inclusiva: coñecer a diversidade para, a partir dela, realizar a unidade (mudanza necesaria e profunda da nosa sociedade). A realidade da aula proponnos o desafío de recoñecer a diversidade cultural, relixiosa e idiomática do alumnado, que se constitúe en punto inspirador para aprendermos a nos recoñecermos os uns nos outros.

O obxectivo principal é nos recoñecermos na diversidade. Coa axuda das familias, recollemos informacións e traballamos con elas de diferentes formas.